簡介：Cody 是我們 Meta Learning 的同學，在重考DSE 的一年裡，他的 Retake 心路歷程是怎樣呢？小弟我邀請他執筆記錄一下他的心得經驗。
重考DSE：記住初心
對於我嚟講，初心同埋努力係最重要嘅。喺我retake DSE 之前，我曾經踏入過 asso 之路（不過得3日）。當刻，我係一心覺得retake重考先適合自己，所以就選擇呢條路啦。喺準備緊DSE重考嗰陣，我都有過放棄、挫敗、憤怒，種種負面情緒都會令自己想放棄、甚至懷疑自己當初嘅決定、同時又驚入返 asso 等等。但係，當我回想起當下企起 asso 門口嘅自己係幾咁抗拒、同時又渴望入大學呢個初心既時候，自自然然就會繼續捱埋落去（ps 最後都係成功入番大學）［按：Cody 入讀城大的公共行政及政治學系。]
Retake DSE：我對努力的看法
喺 retake DSE 嗰陣，「努力」呢個詞係模稜兩可，但又係唯一嘅自我肯定。重讀DSE 可以話係一條破釜沉舟嘅路，情況就好似 double or nothing一樣。成功嘅話，我就可以用一年嘅時間入返大學之路。失敗嘅話，我就要「死死地氣」入返去讀 asso才駁大學（1+2=3年時間 ps 仲有要有機會入唔番🤪）。所以，我抱住「許勝不許敗」嘅決心去行呢條路。好好咁規劃時間既運用（絕大部份都係讀書架啦，唔洗諗）。但係規劃唔等於做到呢個事實，你知我知，單眼佬都知，所以努力做到最好就係我可以做嘅嘢，但係點樣先夠努力？人哋話你好努力，算唔算努力？身邊嘅人都會講你好努力個陣，當時我自己嘅感覺其實就係唔夠努力。因為我將努力同結果掛勾左，所以有幾「努力」喺要去到最後先知。我唯一可以做嘅就係努力到最後（當然啦，努力未必同收穫成正比）。但係，一年後嘅我望返轉頭，呢一年嘅經歷造就左今日嘅我。
Retake DSE 出路因人而異
可能你已經睇過／聽過唔同retakers既故事／經歷。當中，不乏一啲入返大學、一啲轉返去asso、一啲直接出返嚟社會工作。最後，我希望睇到呢篇文嘅你，可以不忘初心、搵到自己想行既路。雖然我成功以retaker既身份入返大學，但係個過程真係好驚險（有願再分享）［按：我等緊你再分享］。